TUIRIGURIRE NGAI NJIRA CIITU- Author Macharia wa Wen

Author- Macharia wa Wen

Kuirigura njira ni gutema kana guthondeka njira haria hangigia na mweke wa kuhitukira. Uguo ni takuga hena rugiri na he bata wa gutemwo njira niguo hagie na hakuhitukira na nikuo kugerera. Thiini wa micii itu nitukoragwo tuthondekete njira cia kugerera tugithii mugunda ona kana hihi tugithii kwa aria turigainie. Tungiiriga njira icio ciothe, uguo nitakuga tutingihota kuma gwitu tuthii kwene ona kana tume nja ya gwitu.

Njira ici niituhotithagia kugia na gwataniro na aruna aitu aria turigainie, na oha igatuhotithia gukorwo na unyitaniri thiini wa micii itu. Ugo ni ta kuga tuikaraga tuiguaine wega.

Riria andu marigainie mahinganira njira, giki ni kionereria ati ni mahitanitie, na gutiri urenda uria ungi athii gwake.

Ota uria tuhinganagira njira, uguo noguo ona Ngai we mwene tumuhingagira njira muturire-ini witu. Uguo ni kuga, rumena rwaingira gatagati-ini gaitu, wendo wa Ngai nituuirigagira thingo cia kuingira micii itu. Tukamenana, tukanyararana, tukaiguanira uiru, tugacambania na maundu maingi moru maria marakaragia Ngai. Nacio irathimo ciake ikaga kanya ga gutonya micii-ini itu ona ngoro-ini ciitu.

Ngai tondu niatuendete muno tondu turi ciana ciake, niakenaga akiona tuiguaine na tugiikara twi kindu kimwe. No maundu maguku thii maria tutitikanagia nimatweheranagia nake. Nikio riria twamenana, Ngai nitumuikagia nja. Wendo nirio riathani rira Kristu atutigiire. Ota uria Ngai atwendete ,nituikarage na ithui twendaine. Twage muuku thiini witu, tutige uiru na tuikarage turi kindu kimwe.

Riria twahitania, nitugiage na ihinda ria kurekanira thiini witu. Ni tondu riria twahitia na twarakaria Ngai, twahoya urekeri wee niaturekagira. Na aturekera niariganagirwo ni mehia maitu, na tukeruha ota ira.

Hindi imwe mutumia wari muhoi Ngai muno,niathire ihoero kuhoya na gukumia Ngai. Riria ahoyaga ihoya ria Baba witu uri iguru, niaiguaga mugambo wamukagiria ukiugaga ‘iiii’. Oiga Baba witu uri iguru,akaigua ‘ii’, Ritwa riaku riroiguo,’ii’. Niathire na mbere na ihoya riu na agikinya muhari uria tugaga ,Utuohere mawihia maitu. Etereire icokia, akiigua ndunacokia. Agicokera ihoya ringi. O akinya haria, mugambo ukaga. Niguo agiire na ihinda ria kuria mugambo ucio atiri, ‘nikii kiratuma ndakinya haha Utuohere mawihia maitu ndiraigua icokia?’. Mugambo o uria ukimucokeria ukimwira atiri, ‘ni tondu uranjira ngwikire uria wagiriirwo ni gwika na uranjira niwikaga no nduwikaga”.

Nituhoyaga Ngai atuohere mawihia maitu ta uria ithui tuohagira aria matwihitie no thiini witu tiguo twikaga. Ona twoiga nitwohera twohagira na tutiriganagirwo.

Maciaro makuonania ati tutiriganagirwo ni mariku? Uiguano ha hau kabere niuthararaga, ngeithi ciina kinyiria, matharau mahithirire, wakorwo nimuraranagiria muno hau kabere miario ikahana tayatharara, ciana ciitu tugacigiria guthii kwa ucio turahitanitie, na maundu mangi maingi.

Giki nguona tari gitumi kimwe kiria gitumaga twage kurekerwo mehia maitu ni Ngai.

Tungihota kumenya atia ati twahera mehia maitu kuri Ngai niaturekagira? Na uyu ti undu utarii ta murimu wa Githuku ati andu othe nimaronaga wina Githuku niundu wa nyegerera ngothi-ini yaku?

Maciaro ma kurekerwo kwa mehia maitu ni Ngai, hari nii nguona ta tukimataukwo na ciiko ciitu kuri aruna aitu aria turekeire na tukariganirwo. Uguo nita kuga, ona thengia wa maundu mahituku maria turahitanitie, twarekanira nitweheragia muuku thiini witu, wendo wakimbiriria tukawonania, tugatheka mitheko itari na kinyiria, ngeithi ciitu igacama o gucama na maundu mangi maingi.

Maundu maingi maria tukoragwo tuigite ngoro-ini ciitu, tukamatitikania nimatweheranagia na Ngai. Maya nimo tuirigagira Ndathimi cia Ngai namo. Uu ati ona Ngai akiendaga guturathima niagaga kanya kau. Riria waiguira mundu uiru ati tondu mwana wake niarathoma wega , niuhingagiriria Ngai kurathima mwana waku nake agie na githomo kiega. Riria wamena mundu ati tondu Ngai niamurathima na nyumba njega ri, niuhingagiriria Ngai hari gukurathima na nyumba yaku.

Maundu macio mothe na mangi maingi nimatuikaga kiirigo hari irathimo cia Ngai, uu ati Ngai niagaga hakuingirira agiuka guturathima.mucii wa uria wendete gutaithia andu aria angi ndwagag irathimo cia Ngai niguo mwene mucii uyu ataithie andu aingi.

Niundu ucio, nitwikage wega  kuri aruna aitu niguo Ngai nake aturathimage. Turuiguanagire tha niguo Ngai nake atuiguagire tha. Niturekanagire mehia maitu niguo nake Ngai aturekagire mehia maitu mothe.

Nituirigure njira cia irathimo niguo Ngai onage ha kugera agiuka guturathima..