 |
| AUTHOR- MACHARIA WA WEN |
Ndoiga twicuranie uhorowigii gatambi twitaga nyenje. Mwihoko wakwa ni
ati gutiri mundu utoi nyenje. Nyenje ni gatambi kogi muno na kendaga guikara
haria hena nduma haria gutari thuu yako ingikona na ihenya. Nyenje ni ihithaga
mwatukaini handu thuu yayo itangihota kumihithukira niguo imiurage. Nyenje
yetagirira turuge na turie na tukome.
Twakoma nayo igokira ikoma nja ya mwatuka
kana haria ihithaga niguo irie kiria giatigara methaini. Na ungimenya thu ya nyenje ni utheri
ungihitia wakie tawa kana utheri o wothe.
Hindi iyo niguo ihotaga gutema ihenya irorete ndumaini ikehithe.
Ihithaga utheri nikii handu ini ha ikene tondu nihagia na utheri wakumihotithia
kuona kindu wega, ii kuringana na uria kimbe mundu kionaga nigutaithiririo ni
utheri ucio?kiuria giagwicurania. Reke twambe tutigane na nyenje hanini.
Mukristiano mubatithie na akorwo ruri rua Roho mutheru, no agerekanio
na nyenje ino kana ukuga nindetana nyenje? Uga ii kana aca. Mukristiano uyu ni
mundu mugi muno na uhotaga kumenya rira gwathuka na agatema ihenya inene muno
niguo gwetha utaithio na kuria ungionekana. Ndakwira nyenye iikaraga
mwatuka-ini na kweha yuragira o mwatuka-ini oro ucio.
Mukristiano nake aikaraga kuu na oragira kuu? Aikara gwake muciii na
mathina moka akorira mahoya-ini.
Noturagira mahoyaini tondu mathina nimoka kana tondu nitubataire mahoya
. nyenje ndakwira yuragira mwatukaini ndumaini niguo yurire thina. Ithui na
ithui twagiriirwo ni kurira mahoya ini. To hindi ya mathina, indi ni mahinda
mothe maria turi guku thi. Nitukomaga mangara mahoya-ini tukaga gwithagunya
tume thina-ini. Uu nikuga , twagaga guikara twiiguite mahoya-ini namo magerio
moka magatukomia mangara.
Witikia witu niwathararire kana uthiaga uthararite ni kwaga gwikindira
na kinyi witikia-ini witu. Nikio wonaga riria twacemania na magerio ona ma andu
mekwenda gutugeria, turabatara o igutha rimwe riumanite na bibilia tugwe
mangara twage gwithagunya.
Mukristiaono mwitikia niuria utagaga ibuku ria Ngai, na uria uthomaga
uhoro uria mwega kuma ibuku itheru ria Ngai, agagiikaraga utheri-ini no ti
nduma ini ta nyenje. Niahoyaga kaingi na kaingi niguo Ngai amugitagire na
mathina mothe.
Mukristiano utendete utheri aikara etereire kugie kibii kia nduma niguo
eyumirie eethere uboco. Ndirenda kuga ucio niuria utendaga gwika wega
ndagataithie mundu uria ungi. Uyu ni uria uturaga gatumaini uria utendaga uthii
wa nambere andu matigataithike. Uyu niuria uhuhagira arunawe mwaki ena maai
kanua. Ungumania, utunyani na maundu macio mangi mothe amekagira mwatuka-ini wa
nduma no akoimira nduma yoka.
Ehatagiriria mwatukaini niguo ehithe kuo no eyumagiria kwagia nduma na
kweha. Ucio ni mukristiano uria winyitithanagia ona ciungano kana ikundi cia
kanitha niguo agataithiririo hindi ya mathina make.
Mukristiano mukindiriku agua mangara niahotaga gwithaura na ogokira
akoima thiina ini ucio. Ndahana ta nyenye iria kumiuraga ibataraga o iringa
rimwe igwe iikare mangara . iria ingiaga kindu gia kwinyitirira niguo yukire no
gukua ikuaga.
Mukristiano mwega utari nyenje nyenje agua kana aringwo iteke aguaga na
agokira. Uguo nitakuga ona erwo witikia wake uhana na utarii, niahotaga
kwihanda na kurugama na uria kanitha imurutite uhoro wigii witikia. Eruo
niahoyaga mihianano niamenyaga na agataukwo muhianano nikii na nuu. Ndaguaga
akoya maguru iguru ta nyenye akaga giakurugama nakio.
Witikia waku no uthimwo ni nduma ndumanu mwatuka-ini, niguo ukome
mangara na waga wa gukunyita guoko ukue.
Kristu ari hakuhi na ithui na nowe tunginyitirira hari wee niguo twagua
mangara tugokira nake na njira ya mahoya.
Gikuu kia nyenje ibatarga o kugua mangara na yage giakwinyitirira. Hau
niho ikuagira. Nakuo kwenyenyio kwa witikia witu kubataraga o guthimwo hanini
tu na ciugo iria ikoragwo ciethetwo ihinda inene muno utuku na muthenya kuma o
ibuku ini ria Ngai na oho kuhitukira matuhuhu ma mithemba yothe niguo ihuthiragwo ta matharaita hari witikia
wa Mukristiano utharare na age kiene
Kanitha niyo nyina witu. Na nikuhitukira Kanitha tungihota kumenya na
gutaukwo Ngai nuu, enda atia kuma kuri ithui, nikii kirakaragia Ngai na
Tungihota gutuika ehokeku atia. Kirira gikindiriku kirai Kanitha iturutaga ni
matharaita ma mbara uturo ini witu wa witikia, na tungirumirira kirira kiu,
magerio ma caitani na aruti wira wake matingiona gia gutuhahura nakio.
Nituheaga Kanitha na wira wayo gitio kiria kimiagiriire na njira ya
kurumia witikia witu, tutige gutuika nyenje nyenje igakomio mangara.
Ni kaba kugia na witikia murumu,
na kuhoyaga kaingi ,na oho kuma mwatukaini wa nduma , niguo Kristu atuhonokagie
kuma magerio-ini.
Tiga gutuika ta nyenje nyenje ikomete mangara.
No comments:
Post a Comment