NITUHOYAGA MAHOYA MAITU URIA KWAGIRIIRE?-Macharia wa Wen

Author -Macharia wa Wen

Mahoya ni njira imwe iria twaranagiria na Ngai, niundu wa maundu matatu maria ma bata makiria kuringana na woni wakwa. Nituhoyaga Ngai niguo tumukumie, tumugoce na tuhere mawihia maitu.

Ngai niagiriiruo ni gukuimio ni indo ciothe iria iri muhuro wa riua. Indo ciothe ciombirwo ni Ngai, na niundu ucio ciumbe ciothe niikumie Mwathani. Nitukumie Ngai witu na nyimbo na Thaburi, tukimucokagiria ngatho. Inyui nyoni ciariera-ini inirai Mwathani. Nyamu cithe iri muoyo cia mititu na cia maai-ini gocai Mwathani. Ona inyui mahiga gocai Mwathani. Riua, mweri na njata ona inyui gocai Mwathani.

Kiumbe mundu nikio kiumbe kiria kiombirwo ni Ngai kiri kia mwanya.  Na mundu akiheo wathani wa gwathaga indo ciothe iri thii iria ciombirwo ni Ngai. Mundu nowe wihagiria Mwathani , agakiuma wega-ini wake niundu wa uhuthu wa mwiri.

Na niguo gucokia ngwataniro yake na Ngai, mundu niari na uigiririki wa kuhera mawihia make mbere ya Ngai niguo Ngai amurekere mawihia make. Uguo niguo twaranagiria na Ngai. Atwiraga tukamumenyithagia mabataro maitu nake niari tuhingagiria.

Kiuria kinene ni atirir, tuhoyaga atia? Nituhoyaga uria kwagiriire? Riria tukuhoya, nitwagiriirwo ni kumenya wega ati ni Ngai turaria nake. Tukimuthaitha nigetha atuthikiririe na atuhingirie mabataro maitu. Nitwagiriirwo ni guthii mbere ya Ngai na gitio kiria kiagiriire niguo atuthikiriirie.

Ni kuri maundu maingi maria magiragia mahoya maitu makinyanire mbere ya Ngai. Wa mbere ni mehia. Mehia nimo matweheranagia na Ngai. Rira twehia, nitwikagira mukuru munene gatagati-ini gaitu na Ngai, naguo mukuru ucio ugagituraihaniriria na wega wa Ngai.

Na niguo kweheria mukuru uyu,nitubatairio ni kuhera mawihia maitu mbere ya Ngai niguo tumukuhiririe. Riria tukuhoya he bata kwerekeria meciria maitu na matarania maitu moothe mbere ya Ngai. Uguo noguo tungihota kwiiguithania na Ngai.

Ni kuri itumi ingi nyingi iria igiragia mahoya maitu mage gukinyanira mbere ya Ngai. Namo nita, mwitio, kwaga witikia murumu ngoro-ini ciitu, kuhoya na mwigatho, kuhoya turi na nganja, kuhoya tondu ni mutugo, na kuhoya uria gutagiriire, na oho gwatha Ngai na kuaga gitio mahoya-ini.

Riria ukuhoya, ni hari bata wa gutarania kiria urahoya. O kaundu goothe wagwetera Ngai he bata ugecuranie muno niguo ugie na ihinda riega ria kwiguatania na Ngai. Nindikitie kuona amwe aitu tuhoyaga tuhingie riahani ati he bata kuhoya. Ihoya ria Baba witu uri iguru, nirio ihoya riria inene muno Kristu atutigiire. Hindi iria tukuhoya he bata kuririkana uguo.

Matuku maria turi riri nirio ihoya riria rihoyagwo uru muno. Ndirenda kuga atia haha. Riri nirio ihoya riria riaingirire muno meciria-ini maitu, ati ona tukirihoya tutiricuranagia wega ngoro-ini ciitu uria turahoya. I tondu niria ingirire muno meciria-ini maitu, uu ati turiinaga tari ruimbo kana tari kundu tutengeretio.

Ihoya riri hindi iria tukurihoya, he bata gwicurania wega ngoro-ini kana uguo turahoya niguo tungienda kana ni kuhingia riathani.

Riria twagweta twoiga,’Baba witu uri iguru. Nitwicuranagia ciugo ici? “Ritwa riaku riroiguo. Niwicuranagia riroiguo nuu? Kana hihi wee no kugweta ugwetaga ciugo icio utekwenda kwiyuria uragweta atia?

Kwaga kuhe mahoya maitu mwerekera mwega ni undu umwe utumaga mage guciara moimirira mega.  Witikia naguo ni kindu kingi kiega muno thiini witu. He bata gwitikia thiini wa Kristu ati mahoya maitu nimarakinyira Ngai, na oho gutuika andu a gweterera. Ngai ndahiuhaga na ndaceragiruo. Okaga ihinda rira riagiriire.

Riria ukuhoya, he ihoya riu riaku gitio kiria kiagiriire. Tiga gwatha Ngai kia hinya. He ciugo twemenyeririe kugwetaga na ndiui kana niuri wecurania uria ukoragwo ukiuga. Na nikio gitumi kinene ndoiga he bata gwicurania ngoro-ini uria turahoya. Riria twona thina kana undu wagutumakia, he tumigambo twiciragia ati ni kuhoya turahoya indi tugakorwo ni gwatha Ngai. Hindi iria woiga,” Ngai uka na ndugatumane”. Niuri wecurania uguo ni kuga atia? Na niguo umenye ni gwatha Ngai-ri, wendaga erehe nikii na niui wega Ngai ahuthagira mundu ucio ungi. Niuri weciria kana Ngai no ooke erehe hau umwone arugamite, kana ni mutungu,muiru,muceke, mundu mweru kana mundu muiru?

Wendaga age gutumana erehe wee mwene nikii? Niwonaga ta Ngai angiuka atahitukiire mundu ucio ungi? Tawicuranie angiuka umwone na maitho ungika atia na ungitaukwo ucio niwe Ngai atia.

Ici ni ciugo iria twemenyeririe kuhoya nacio na ringi na ringi ni ithue tuhoya uria gutagiriire, tugagitura tugaga Ngai ndacokagia mahoya maitu. Tondu ndigukuhitha muruna wakwa watura wetereire Ngai erehe, akerehe agikugira niguo agagucirithie kana agakuhe muoyo. Haha hekuringana na kio giaku.

Undu ungi ni mahoya ma ndemano. Ati tondu nimuhitanitie na mundu, mwakinya hindi ya kuhoya ukera andu rekei tuhoe. Ugagitema ndemano niguo uria muhitanitie nake aigue tari kuhoya urahoya indi meciria maku mothe me uria uturithitie mundu ucio muhitainie. Macio ti mahoya.

Mahoya nimekubatara gukorwo na mutaratara mwega niguo makinyire Ngai na njira igwete.

Nitwagiriiruo ni kuhoya mahinda mothe kuri hindi ya gikeno kana hindi ya kieha. Amwe aitu nituriganagiruo ni kuhoya hindi iria turi na gikeno. No hindi ya mathina yoka tugatengera mahoya-ini. Ungirathimwo ni Ngai ririkanaga kuuga ni wega. Kuu nikuo gucokia ngatho.

Rira ukuhoya ,ririkanaga kuhoera ona muruna waku. Tiga kuhoera mundu ucio ungi  uuru. Muhoyagire wega nake Ngai niarikurathimaga. Tiga kuhoya uheo indo ciothe aria angi mage. Hoya Ngai akuhe kiria gikwagiriire niguo acio angi nao matikage.

Ndirenda kuga, he bata kuheaga mahoya maitu gitio kiria kiagiriire, ni tondu ino nio njira iria twaranagiria na Ngai. Tiga kuhoya na mwigatho na urimu. Hoya ugicuranagia ngoro-ini nikii urahoya, nake Ngai niegukuhingiria.