Thursday, 4 August 2016

TWAKIE MWAKI WA UKRISTIANO WITU



TWAKIE  MWAKI WA UKRISTIANO WITU.


Author; Macharia wa Wen
 
Heho yumaga mundu thayu haria amwe aitu twaigua heho twethaga nguo iria cingituongerera urugari. Naguo urugari oro ucio ungikiria njano wauraga nguo. Uu ni kuga mundu niagaga gitumi gia gukorwo ari na nguo icio nyingi mwiri-ini wake.
Moimirira ma heho ni kuhehenara ,kwaga riri, kuinaina na angi aitu tugiaga kigimbi ngothi ini ya mwiri witu. Na nokio mundu anaigua heho ethanaga na nguo iyo ingimuongerera urugari, ona kana hihi agetha handu angiiguira urugari ucio mwiri wake ubatarite. Angi aitu twakagia mwaki ona kana hihi kindu kingi o githe kingituhe urugari ucio.
Mugikuyu oigaga urugari umanaga na nda. Kuringana na nii ningunyita mugikuyu mbaru ,ni tondu mundu muhunu ndaiguaga heho. Kwa ugo riria mundu aria na ahuna, niaganaga na heho thiini wa mwiri wake. Maundu make amekaga oro uu wega. I tondu mwiri wake wina urugari. No mundu muhutu, aturaga ahehenarite hindi ciothe gwata hindi ya riua.
Mundu mugi, aikaraga ebangite kuringana na mahinda na riera. Hindi ya riua , niahotaga kuhura maburana make mothe ona kana hihi nguo cia kumwikira urugari thiini wa mwiri wake. Ica ikuhi nituramukagira mohoro kuma maburi ma nja wa buri ati, muigana wa andu aingi niurakoretwo ugikua niundu wa urugari kuingiha na gukira githimi. Kungi nakuo heho ikaingiha kinya ikaya kuraga andu. Maya mothe ni maundu ma riera na riera ni ria Ngai.
Njitikiria hugukire ndereti ino na njira ya mukristu thiini wa Kristu.  Mukiristu agiriiruo ni gwakia mwaki wake atia na muno muno thiini wa kanitha na bururi ini? Giki no kimwe gia kiuria kiria ingienda mundu o mundu ecuranie ngoro ini yake.
Mwaki wakanaga ni nguu gucemania. Kuri nguu muthemba wa mbaturo na nokuri ngu muthemba wa thari. Na ciothe niiri bata wacio ni tondu thari itaithagiriria hari gwakania mwaki na ihenya, ni tondu ni inyitaga mwaki ucio na ihenya, nacio nguu cia mbaturo nicio inyitaga mwaki ucio kwa ihinda inene.
Nguu no ikoruo iri nyumu kana hihi iri njigu. Nguu nyumu ciakanaga wega muno na itikoragwo na ndogo nyingi. No nguu njigu,ni ikoragwo na ndogo nyingi muno, ningi itiakanaga wega.
Ningi ohoo ninguenda tumenye ati mwaki niwendaga riera riakuigana niguo wakane. Mwaki wanakio haraya, niumenyekanaga na ndogo.
Uu no taguo nake Mukristu niagiriiruo ni gwakia mwaki haria ari. Uguo ni takuga, Mukristu ari na itemi ria gwakia mwaki wa witikia wake thiini wa kanitha. Thiini wa kanitha kuri na miaki miingi ikoragwo kana yagiriiruo ni gwakio, niguo kanitha naguo uthereme. Ici ni ikundi cia kanitha.
Ni kuri ikundi cia ciana nyinyi, mbeu njithi na andu akuru. Na niwega mundu o mundu akorwo ati hari haria ari kuringana na mahinda.  Na niguo miaki ino ya kanitha yakane, kanitha ni irakubatara, niguo kumihotithia kuiga mwaki wa Kristu uri mwakanu.
Ikundi ici , ni ituhotithagia kwimenya muno makiria thiini wa ukristiano witu, oho igatuhotithia gutukana na aria angi thiini wa wira wa kanitha wa Ngai. Hihi uri wecurania takorwo gutiri ikundi ici uria kanitha ungikoragwo uhana.  Nguona ta kanitha ingikoragwo itete mwerekera murumu. Na nikio ninjiguaga ngenete na ngacokeria ambiriria a ikundi cia kanitha ngatho muno ni wira wao mwega, wa gwiciria uria mangiturehe hamwe.
Tariu ngiraga ngecurania takorwo gutiri gikundi kia YACA thiini wa kanitha nii ta Macharia wa wen ingikoragwo kuu kana ingitaragiruo ha thiini wa kanitha?
Thiini wa ikundi ici, guku nokuo tuhotaga kumenya Ngai muno makiria, kumutia na kumutungatira wega. Ningi, ikundi ici ni ituhotithagia kumenya kuhoya, kuina ona kuhithuria iheo ciitu.
Ng’endo iria ibangagiruo aria mari ikundi ini cia kanitha, no ihotithagia andu kumagara na kumenya kuingi.  To uguo tu. Ni itaithagiriria mundu gutaukwo wega na uru.
Thiini wa ikundi ici ota uria ngukwirite hau kabere niate, ni kuri nguu njigu na nyumu, na iria njigu irutaga ndogo nyingi iria itogagirira mundu akaga thayu wa gwota mwaki ona kuri heho. Nguu ici njitikiria tucigerekanie na andu aria maingiraga thiini wa ikundi ici cia kanitha, na wira wao ni kuruta tumiario tungi tururu kuruga ndogo ya mutaru muigu. Aya no ta aria maregaga kuingira ikundi cia kanitha, na wira wao muingi ni kumenereria aria mari ikundi ini. 
Ngukwirite kuri thari na mbaturo. Na ndakwira ciothe gutiri itangiraria mwaki. No thari na njira ingi ni aria maiguaga uhoro wa gikundi ,magatuika arumiriri a kio no thutha wa kahinda kanini makaga bata wakio. Magakihana thari iria ciakagia mwaki na inya muno, igagiakana wega no macungiriro itikaraga riko ihinda inene.
Aria nao mahananitio na nguu cia mbaturo, nia aria ona thengia wa gwakana kahora,aya nio maigaga mwaki gwa kahinda kanene.  Ningi ruku rwa mbaturo noruo rungiraria mwaki. Ithui ta Akristiano, ni twagiriiruo ni gwakia mwaki wa witikia witu, haria turi na kuria turithiaga. Wakorwo wi mutumia wa CWA ona kana hihi gikundi kingi o githe gia kanitha, na niwoimagara wathii rugendo ona kana hihi wathamira cikaro ingi, ni wega umenye ati, mwaki wa kanitha no urakubatara ugomanie ruku rwaku ndukahore. Nyitanira na andu a giikaro kiu uri hari kwagirithia wira wa Krist thiini wa kanitha wake.
Tiga gutuika karuku kaigu karia gatogaga gakagithia andu thayu. Ningi wee nawe tiga gutuika aria mahuhaga mwaki mari na maai kanua.  Makimenyaga wega ati mwaki ucio nikuhora ukuhora. Tuika mukristu wakitie mwaki wake na ugatugira muno makiria. Ndukanamakio ni aria matari haria makoragwo menyitiriire thiini wa kanitha. Na oho itanariganirwo, ndukanaingire thiini wa gikundi gia kanitha ati niguo ugataithio riria ugakorwo na thina. Aca. Reke thiini wa ngoro yaku kugie kumenya ati uyu ni utungata thiini wa kanitha.
Ndinakiuga ati aria turi thiini wa ikundi ici tutiagiriiruo ni gutaithiriria umwe witu ari na bata. No nonyende tumenye ati uyu ni wira wa Ngai turutaga na hari na igai Ngai atuigiire.
Wee nawe uteri haria uri, wicuranie nikii gitumi kinene kiria kigiragia winyitithanie na kanitha.








No comments: