UGUUTA NI THIINA

 UGUUTA NI THIINA –macharia wa wen,www.machariawawen.blogspot.com

 Uguta uria turi naguo ni kihumo kimwe kia mathina maria twonaga thiini wa uturo witu riria turi guku muhuro wa riua. Riria mundu atuika muguta, niahitukagwo ni maundu maingi mega maria mangimuguna thiini wa uturo wake.

Riria ng’aragu yoka yambagiriria kwa mundu kiguta. Gitumi kinene ni tondu riria andu aria angi maharagiria migunda yao niguo mbura yoira mahande irio ciiagukaria ruciu, mundu kiguta akoragwo eyuite riua kiruru ini , aria angi mihang’o ya guku thi ikamaingihira makaga ihinda ria kuhariria migunda yao.

Angi nimegwatagia ati migunda yao I mahiga na aria angi makegwatia migunda yao ni mihinju. Na warora mugunda wa uria mariganitie nao, tiri niumwe, giikaro ini kimwe, no o tondu matiendaga kuruta guoko muhuko magituraga o metereire gukara ruhi kwa aria marigainie.

Mathina maria turona guku bururi ini witu na thii yothe moimanaga na uguta witu na kwiyenda. Aingi aitu nitukoragwo tukumitie wira wa kwene muno tondu nitukuheo mbeca. Amwe aitu niaruti wira muno makiriia kwene. No hakinya ni kwao ene makagia na uguta uteri githimi. Indo ciene itiri ndokeiruo nuu.

Bururi witu ungiri mwega  makiria takorwo tweheria uguta uria tukoragwo naguo na twirutire wira na moko maitu. Tahura mbica thogora wa indo cia migunda iria tuguraga ndukaini. Nyingi ciacio ni iria ithui tungirima migunda ini itu. No twiiraga na ngoro ciitu ati kindu giothe no mbeca. Tugakiira ngoro ini ciitu ati bata munene ni tukorwo na mbeca mihiko ini itu.

Na niundu wi thoni muno kuona mundu wina mugunda mwega na kinya gitunguru na runyeni rwa thoroko no agurire. Ati mugunda wake takorwo micege nio igethagwo niwe ungituika namba imwe. Na gutiri mundu thuire ta uria wi mugunda mwega na ndarimaga no ona irio migunda ini yene niahotaga kuga ni njega.

Undu ucio ungi utumaga mathina maingi matuhinyiririe ni kwiyenda. Amwe aitu nitukoragwo twiyendete muno na makiria tukenda miiri itu makiria. Ati wee ugaga ndungiriima ndugathechwo ni miigua kana uroruhe moko na ndwara ciaku igie giiko. Angi aitu matiui kurima tondu onao aciari aitu nimagire gutuonia kurima na moko maitu o kuma tene.

Muciari ona angikorwo ugaga niuri mbeca na ciana ciaku itingirimia kana irime tondu wina mbeca, niwega cimenye kuoya theci na iguru. Na ndiinama ati onawe  utonga ucio winaguo nduomire na iguru o uguo tuhu. Ni wira warutire nake Ngai agikurathima.

Na tikuga ati munyaka waku niguo wa ciana ciaku. Ningi utonga  nduturaga. Ona mbeca iria twonaga twinacio ni nyona ndithiire. Ndiui kana niuri wona mundu thiini wa gicagi kianyu wari mbeca muno na watiikite muno niundu wa utonga wa mbeca na indo ciake? Na riu itituire.

Indo ciothe ni Ngai uheanaga. Na wona mundu uteri na ni muruti wira ti kuga ati nadakagia. Mundu wi kio Ngai no akamurathima ihinda rimwe riakinya. No mundu kiguta, aturaga o eroragira andu amkirathimwo akoragia kari kii maheaga Ngai tondu marathimagwo uu.

Ngai onake niendete mundu wi kio wira ini wake. Mundu wikio ona mathani ma Ngai niamahingagia maingi. Mundu kiguta niwe uciaraga muici, mundu wi uiru, mundu utetagia Ngai mahinda mothe, na mundu wihokaga mundu wa guku thii niguo amutaithie.

Undu ucio ungi ingienda kuuhutia o hanini,  na uria utumaga ona thiina uuke ni kwenda mbia. Riria twagetha magetha maitu, nituriganagirwo ni rucio na kwa uguo tukendia magetha maitu tugetiga uguo. Riria tweak uguo, nitutemaga kanya ga gutetia Ngai thutha mutheri. Twendia indo ciitu, muthenya wa ruciu twanyitwo ni thiina twambagia gutetia Ngai.

Nima tutigatangike ni kiria tukuria kana tukunyua. Uguo niguo ibuku ria Ngai ritwathaga. No ona kuri oro uguo, Ngai niathuire irimu. Riria wendia mbembe ciaku na wina ciana ikurorete iguru,ureciria niuhingitie riathana ria Ngai?  Ngai niendete m,undu mugi. Na giki nokio gitumi kinene kiracungiriria andu guikara makiingagirira thirikari ati amataithiririe. Mundu agutara serikali ingilie kati.

Thirikari na uguta waku iraingirira ha? Ngai oiragia mbura kundu guothe na kwa andu othe. Uguo ni kuga ndathutukanagia. Na tondu wee watuira mugunda waku uri mahiga ndukuraga irio I, cong’e na thangari ciinyitagira kuu? Mimera iria tuhanda miingi yayo ibataraga o kwinyitirira tiiri ini o munini. Turore kindu ta mboco.

Miri ya mboco iingiraga tiri ini o inji ta imwe na nuthu na ciaingiha muno inji igiri. Thoroko taguo. Ona mbembe ibataraga kwinyitirira na ikorwo hau inyitiriire hena unoru.

Ona nikaba ungikihanda iria ingikura gwaku na ithui tuhande iria ingikura gwitu tugacenjania, gukira gukorwo gwaku gutiri ona kii.

Ngiheana ngerekano, ningenagio ni andu a Gaturi muno. Kundu ta Muirua Gaturi, Kimathi na kwa Muthungu wa mbaki urorete Sagana kuma Murang’a. kundu guku ungithii hindi ya riua uheo mugunda ndungiwenda niuria migunda ikoragwo ihunyukite ikaga riri. No uma niati migunda iyo niyo yumaga mboco muno na mbembe na ngwaci. Matihandaga ikwa tondu ikwa ibataraga kundu kwina tiiri muingi. No niaruti wira muno nigetha makahanda kiria gikuraga kuo.

Kundu kuu kwi mahiga. Hau tia anga. No andu acio mangenagia muno tondu ti kuga mahiga macio me kundu guothe thiini wa mugunda. Na niundu ucio mahandaga na marimaga haria haroneka hena gatiri kanginyitirira mumera.

Na gutiri undu kana mundu undakaragia ta andu a kundu ta gwitu Mugoiri, aria mari migunda no matirimaga. Acio nao megwatagia thangari. Ngakiuria, utaruta moko mihuko uciimbe urute thangari iyo ugwiciria yeruta mugunda?. Airitu ikumi utuku aria mari na matawa mao aria metereire Muhikania,atano mari kio na atano mari aguta. Aria matawa mao makanaga matiari aguta. Nikio nimekuiire maguta mao kuma o kuraya matekuga nimekumanogia. No aria matari na maguta,aria matawa mao mahorire,acio matiendete kunoga. Na nikio ona matawa mao mathira maguta matiekuiire . na nikio guta wao na kwiyenda kwao gwacungiriirie kwaga kumuona muhikania.

Wee nawe, ruta moko muhuko wirutire wira waku na we ndukaga gia kuria kana giakunyua. Ningi ni wega umenye ati Ngai niathuire iguta. Na muremwo ni wira egwatagia mugunda uri mahiga.

Follow me and more stories on Blogwww.machariawawen.blogspot.com >, wamukire maya na mangi maingi .