MBIIA TI MUTHUGUITI

MBIIA TI MUTHUGUITI-by Macharia wa Wen.

Wimwega murata wakwa? Ninjuui niwageithika na uguo ni kuga nduuri na uuru. Ni mwihoko wakwa ati kuma mweri muthiru , Ngai witu no akumenyereire o wega ,na no uthiite na mbere na kuruta wira waku wa o muthenya, ni tondu tugaga riria tukuruta wira witu, tukoragwo tukigacirithia wira wa uumbi wa Ngai.

Na ota mutugo, reke nguririkanie ati ,ni wega gucokagiria Ngai ngatho mahinda mothe. Uumuthi ndoiga twicuranie kaundu kanini kari haha. Ngwihoka gutiri mundu uteri wona mbiia. Iri muoyo kana iri nguu. Na oho gutiri mundu uteri wona kana ona hihi akaria muthuguiti.

Mbia ni kiumbe kimwe, kimenetwo muno ni andu. Nikuri mbia cia githaka,na nicio amwe aitu tuciitaga ngaara kana mbuuku, na no kuri mbiia ingi iria cikaraga nyumba, na icio nicio tuciitaga mbiia. Mbiia yanaingira ikumbi ria murimi, niyagithagia murimi thaayu, muno makiria nitondu wa uria ithukangagia magetha make.

Riria murimi amenya kana ringi ona mbiia iyo kana icio, niageragia muno gwetha njiira ya gucinina. Oho mbiia yanaingira nyumba, ni njuui ni uui wira uria irutagira mwene nyumba. Ta kuria nguo, kuririra irio, guthukangia indo nyumba na oho ona gucambithia mundu. Muno makiria nitondu mbia no yumire riria uri na mugeni kana ageni, na iike kiundu kingicungiriria ageni aku kuira ngoro ona ni irio iria ukumarugiire.

Tugaga kuri njiira nyiingi ciakuraga mbiia. No uhuthire mutego, no uhuthire ndaawa, no uhuthire mahato, na oho no uriithie nyaau. No maya moothe no makorwo mari kihonia gia kunina mbiia gwaku,ona kana hihi mage gugutaithia.

Hihi no gukorwo niureyuria gitumi kinene gia kuga mbiia ti muthuguiti. Nituui wega ati, mbia niyendete guikara handu hega, imwe ciikaraga marima ini,miatukaini, mambiia, nguo ini, ona ingi ni ikinyaga handu ukaingira cubaini ona kana hihi mikebe iria mikuru.

I hihi uri wakora mbiia yakite gitara kiayo mukebe ini wa mithuguiti, kana koko? Weciririe atia? Aingi aitu twiciragia uria tungiuraga mbiia ino. Ringi na ringi no ukore ciana cia mbiia iciariirwo mukebe ini ucio wa mithuguiti. Gukorwo gwa ciana cia mbiia iciariirwo mukebe ini wa mithuguiti, ti kuuga ati mbiia icio ni mithuguiti. Ona ti kuga nyina yacio yari muthuguiti. Ndeto ino no iiguike taari ng’ano cia marimu. Noo, mbiia ici niciagiriirwo kumenya,hau niguikara ciikaraga kana hihi niho ciaciariirwo.

Imwe cia mbiia ici no ciuge, nii ndiina munyaka nitondu njiaraniirwo na mbiia ingi na twaciariirwo mukebe ini wa mithuguiti. Kwa uguo tutiri na thiina tondu andu othe nimatwendete niundu wa guciaranirwo na mithuguiti.

Nikii kiratuma nii ta Macharia wa Wen huthire ngerekano ino ya mbiia na muthuguiti? Gukorwo nii njiariirwo mucii wa Akristiano, no gutume ngoorwo ndi mukristiano muruumu kana hihi ngorwo itari. Guciaranirwo na muici ti kuuga ati no kinya ngorwo ndi muici. Na oho guciaranirwo na mundu mwega, ti kuga ati ndikithuuka.

Ngwihoka twi hamwe muno. Na tondu kuuga ni noru ti kuuga ithiinjwo, ni ndikiitie gwika utuiria wakwa kiumbe na ngoona aingi aitu turora ni gwitua mbiia iria ciaciariirwo mukebe ini wa mithuguiti. Aingi aitu, nitwagaga bata wa guthii kanitha, ati tondu mami na baba witu nimathiaga kanitha na nimatuhoyagira. Angi nao moigaga, ndingithii kanitha tondu ona ndakua ndikaga guthikwo ni muhunjia, ati tondu ng’ania witu ni mutongoria wa gikundi gia kanitha, na niagathaithanira kuri muhunjia.

Ningi angi nimeiraga ati, o matimakaga kuona ati muhunjia niakahinga riitho niundu wa andu ao gukorwo nimathiaga kanitha, na kwa uguo o utungata wa kanitha matingiwaga.

Oho gukorwo nii tuciaraniirwo ni Muhunjia, ti kuuga ati ndikamathe Ngai wakwa ati tondu muuru wa maitu kana mwari wa maitu ni muhunjia. Aca, no kinya nii mwene ndiyethere mwoyo wakwa. O mundu akoragwo na muoyo wake. Andu a Ngai moorage ni kwaga umenyo. No aingi ti kwaga umenyo. Aingi aitu ni kuira maundu na gwikira muhuthia, na oho kwihocia hari andu aitu.

O mundu ari na muoyo wake wee mwene. Na he bata mundu arimire muoyo wake. Gukorwo uumite mucii wa Ukristiano, na nduratiira Ukristiano ucio, gutikagiria Ngai aguciirithie. Gukorwo uciaraniirwo na andu athingu, na ndwendaga uthingu ucio wao uingire thiini waku, gutikagiria utuirwo ituiiro ni Ngai.

Ungiririkana rugano rua Gitonga na Lazaro, niukuririkana ati, marikia gukua ni macemanirie. Umwe ari mwena wa muoyo wa tene na tene, nake uria ungi ari mwena wa mwaki wa tene na tene. Gitonga thuutha wa kwiyona uria kiaheraga ni kuhia ni mwaki , nikieiraga ati no kihote gutaithiriria aa muru naa mwari wanyina, hari gutuumana meerwo macenjia mithiire yao niguo makahonoka.

Niukuririkana uria kierirwo ni Ngai. Ndirenda kuuga atia? Ndirenda kuuga, o mundu ari na uigiririki wake mwene wa  kwinyitithania na Ngai wake. Uthiingu wa Mami na Baba, Muuru na Mwaari wa maitu,Muthuuri kana Mutumia wakwa, Mwana wakwa kana  Muraata wakwa, nduukagiria Ngai anduire ciira wakwa na kihooto.

Mundu woothe, ni kumatha amathaga muoyo wake. Gutiri mundu umathagirwo muoyo wake niuria ungi. Muthondeki wa muthuguiti authondekire na akiwikira mukebe wake. Uguo notaguo Ngai wee mwene ombire mundu na akimuga guuku thii. Amumbire ari na muhiano wake. Mundu ni kio kiumbe kiria kii bata muno kia Ngai. Na kuuga nikio kiumbe kiria kii bata ti kuuga ati mundu aikare oro uguo ,akiiraga ngooro ini yake ati Ngai ndangiumba mundu na muhiano wake acoke amuute.

Thondeka ngwataniro yaku na Ngai ,tiga kwihocia haari utuuro wa mundu ungi.