NJOOHI NI NJOHI

NJOOHI NI NJOHI-By Macharia wa Wem

Uri mwega. Umuuthi ndona ni kwagiriire muno twicuranie uhoro wigii miturire itu , muno ngirongoreria uriu wa muturire wa oro umwe witu. Maita maingi nitugaga ati aria manyuaga njoohi nio mariagwo ni njoohi iyo. Njoohi itagwo njoohi ni todu niyohaga aria maminyuaga.

Wananyua njoohi no kinya ikurie, nah au niho tugaga wi muriu. Tungiciria uhoro wigii njoohi na wandanduku, ni tuhote kuona ati njoohi yari kuo kinya hindi ya tene. Uguo nitakuga andu a tene no maminyuaga. Na ona makiminyuaga ,manyuaga na mutaratara mwega.

Ngiandika uhoro uyu,ona kana hihi ngienda twarie uhoro uyu wa njoohi, ti kuga ati nindiranyita unyui wa njoohi mbaru. No uuma ni ati, no nyende twiyurie unyui wa njoohi uthararagio nikii kana uthararagia kii thiini wa miturire itu.

Nitwiriga kuona mutongoria wa bururi akirugama na kuga na kinyi cia igana ni cia igana hari unyui wa njoohi,makiria gicigo gia gatagati ka bururi uyu witu wa Kenya. Uu ni thutha wa andu aingi makiria a ruriri ruru rwitu gukorwo makuite thutha wa unyui wa njoohi itari njitikirie. Ciituikaga ti njitikirie ni undu kii? Kuringana nah aria tukinyite, mbia na utonga wa ido cia thii ni iracungiriria uthondeki wa njoohi cia mithemba miingi, andu magietha utonga wa guku thii,mariganiirwo muoyo wa mundu uri bata muno ona gukira indo ciothe.

Giki nikio gitumi kimwe kia uthondeki wa njoohi itari njitikiriku miiri ini ya andu. Tugacoka oroho ithui nitwatuikire andu akoroku, aria nio mahuthagirwo hari guthima nikii kingituria mundu muoyo, ona kana nikii hihi kingiuraga mundu.

Nonyende tumenye ati, athondeki a njoohi  ici matikoragwo na tha hari wee unyuaga njoohi. Gitumi ni tondu, ona kindu kiria gitari kianyuo kana gikario, o mendaga kumenya kana no kirio ona kana kinyuo mbere ndaya mamba gugithima na muoyo waku. Na ota uria ukiui ati yenda muno ikuraga rurira, wee wanyua gikombe kiu kimwe,waga gukua kana kura maitho, makamenya biacara ciao niciagacira.

Matuku maria turi,anga notuge nimo matuku maria marathirwo ati andu ni makaga thaa na mundu niakoragaga muru wa ithe niundu wa ido cia guku thi. Munyui na tondu wee ugaga bata ni njoohi ri, uri wecurania niguo njoohi ino ituike njoohi ithondekagwo atia na ituikaga njoohi nikii,kana hihi wee ugaga bata ni njoohi?

Uri wakorwo ho njoohi iria itari njitikiriku iguitwo ukeyonera ithondeketwo na miratina ya muthemba uriku? Hindi iyo ya tene ndonaga maithe maitu makirinda njoohi na miratina. Na kiria ndonaga gigikirwo ni miratina, maai, cukari kana uuki. No ndionaga ndawa o yothe igikirwo njoohi ini iyo. Ndiomire nyonete iratu nguru na mibira ya kondomu igiikio njoohi ini.

Ndikiui kana hihi maithe maitu nio matataukitwo wega I kana ni haria gutari iratu na mibira ya kondomu. Ndiui no nindigagwo muno. Na tondu turoigire maithe maitu ni a analogue, na ithui turoiga turi a digital, ai, udigital witu anga niguo mwihire maundu ini. Ni u digital uriku ugite tunyue giiko niguo tumenyeke tutiri a analogue? No kuria ndoria. Mibira ya kondomu na wamenya ndikuaga uuki kana cukari, na wamenya wira wayo niuriku yatuikire miratina hindi iriku? Haha niho njugaga kaba nyambe njooke analogue nduo kirimu.

Maithe maitu maikaraga matuku maingi muno, na aria matigarite ti tumwana ninjui niui uguo. Ona gutuika ithui niturenda gukunderia matuku mao na njoohi cia miratina ya mibira ya kondomu na iratu nguuru, na ithui nikio ona turi a digital uguo tureciriria ngoro ini ciitu turakua turi o acua. Ugakiona mirimu miingi iraturaga otukiugaga turi a digital, nao aria mari a analogue magathii na mbere na muturire.

Tuume hau na umenye twina kariko nawe. Ninyonaga miti ya miratina migunda ini itu ,ngoona uria ikuraga ,mathangu mayo na maciaro mayo. Na oho ngamenya miratina na nimo maciaro mayo ihuthagirwo guthondeka njoohi ya unduire witu. No miratina ino ingi ya mibira ya kondomu na iratu na nguo nguru, ndiri ndona ikuragio kuu na mathangu mayo makuraga atia. Haha unyite wega , ninjui mundu ni mundu wahota gwiciria uria uraigua niguo wega gwiciriria. Hau ni ndoima.

Ngwirire njoohi ni njohi. Riria wanyua njoohi, macungiriro ni kuohwo wohagwo niyo. Mucii waku ugatharara, wira waku ugathira, bururi ugacoka na thutha hari uthii wan a mbere, umbi ugathira, atumia makora, athuri makagia heho, makaga gukenerera ihiko ciao, ciana ikagagaya na maundu mangi maingi.

Gitumi ni tondu, njoohi ino niyakuohire kinya hakiri. Igikuonia guthii wira niurimu. Igukuonia gwithamba ni waana. Maundu macio mothe moimanaga na kwohuo ni njoohi.

Matuku maria turi riu ona atumia maroiga nimaiganaire na athuri. Niundu ucio ugakiona onao nimaranyua njoohi. Tahura mbica mucii wa muthuri na mutumia na eri nimanyuaga njoohi. Kuga ati manyuaga makohwo eri. Inacio ciana? Gutiri kindu kindakaragia muno ta kuona mutumia unyuaga njoohi. Wanyua njoohi ciana ciaku ikunyua njoohi? Na kuhitia muno tondu ngima yumaga mutuini naguo mutu umaga mbembe ini, mucii uria aciari manyuaga njoohi, ona ciana macungiriro mao no njoohi. Mucii wao ugakiohwo o uu wega, ruciu ukaigua makiuga “serikali saidia nyumba yangu imebomoka”.

Oro nikii gitumaga ithui andu a ruriri ruru ruitu no ithui tunyuaga njoohi kinya iria iroraga andu na igatua andu itumumu? Nitukwenda twicirie keri. Ana tondu twiraguo ma tukoiga nitwarumwo,nii ona nii nguga tutigage wana ona haria. Tuatuikire laboratory, tuthimagwo na ithui ni njoohi iriku njega na njuuru? Wenda kuuga nindakuruma,ni haku mwande, ndumiriri winayo riu.

MBIIA TI MUTHUGUITI

MBIIA TI MUTHUGUITI-by Macharia wa Wen.

Wimwega murata wakwa? Ninjuui niwageithika na uguo ni kuga nduuri na uuru. Ni mwihoko wakwa ati kuma mweri muthiru , Ngai witu no akumenyereire o wega ,na no uthiite na mbere na kuruta wira waku wa o muthenya, ni tondu tugaga riria tukuruta wira witu, tukoragwo tukigacirithia wira wa uumbi wa Ngai.

Na ota mutugo, reke nguririkanie ati ,ni wega gucokagiria Ngai ngatho mahinda mothe. Uumuthi ndoiga twicuranie kaundu kanini kari haha. Ngwihoka gutiri mundu uteri wona mbiia. Iri muoyo kana iri nguu. Na oho gutiri mundu uteri wona kana ona hihi akaria muthuguiti.

Mbia ni kiumbe kimwe, kimenetwo muno ni andu. Nikuri mbia cia githaka,na nicio amwe aitu tuciitaga ngaara kana mbuuku, na no kuri mbiia ingi iria cikaraga nyumba, na icio nicio tuciitaga mbiia. Mbiia yanaingira ikumbi ria murimi, niyagithagia murimi thaayu, muno makiria nitondu wa uria ithukangagia magetha make.

Riria murimi amenya kana ringi ona mbiia iyo kana icio, niageragia muno gwetha njiira ya gucinina. Oho mbiia yanaingira nyumba, ni njuui ni uui wira uria irutagira mwene nyumba. Ta kuria nguo, kuririra irio, guthukangia indo nyumba na oho ona gucambithia mundu. Muno makiria nitondu mbia no yumire riria uri na mugeni kana ageni, na iike kiundu kingicungiriria ageni aku kuira ngoro ona ni irio iria ukumarugiire.

Tugaga kuri njiira nyiingi ciakuraga mbiia. No uhuthire mutego, no uhuthire ndaawa, no uhuthire mahato, na oho no uriithie nyaau. No maya moothe no makorwo mari kihonia gia kunina mbiia gwaku,ona kana hihi mage gugutaithia.

Hihi no gukorwo niureyuria gitumi kinene gia kuga mbiia ti muthuguiti. Nituui wega ati, mbia niyendete guikara handu hega, imwe ciikaraga marima ini,miatukaini, mambiia, nguo ini, ona ingi ni ikinyaga handu ukaingira cubaini ona kana hihi mikebe iria mikuru.

I hihi uri wakora mbiia yakite gitara kiayo mukebe ini wa mithuguiti, kana koko? Weciririe atia? Aingi aitu twiciragia uria tungiuraga mbiia ino. Ringi na ringi no ukore ciana cia mbiia iciariirwo mukebe ini ucio wa mithuguiti. Gukorwo gwa ciana cia mbiia iciariirwo mukebe ini wa mithuguiti, ti kuuga ati mbiia icio ni mithuguiti. Ona ti kuga nyina yacio yari muthuguiti. Ndeto ino no iiguike taari ng’ano cia marimu. Noo, mbiia ici niciagiriirwo kumenya,hau niguikara ciikaraga kana hihi niho ciaciariirwo.

Imwe cia mbiia ici no ciuge, nii ndiina munyaka nitondu njiaraniirwo na mbiia ingi na twaciariirwo mukebe ini wa mithuguiti. Kwa uguo tutiri na thiina tondu andu othe nimatwendete niundu wa guciaranirwo na mithuguiti.

Nikii kiratuma nii ta Macharia wa Wen huthire ngerekano ino ya mbiia na muthuguiti? Gukorwo nii njiariirwo mucii wa Akristiano, no gutume ngoorwo ndi mukristiano muruumu kana hihi ngorwo itari. Guciaranirwo na muici ti kuuga ati no kinya ngorwo ndi muici. Na oho guciaranirwo na mundu mwega, ti kuga ati ndikithuuka.

Ngwihoka twi hamwe muno. Na tondu kuuga ni noru ti kuuga ithiinjwo, ni ndikiitie gwika utuiria wakwa kiumbe na ngoona aingi aitu turora ni gwitua mbiia iria ciaciariirwo mukebe ini wa mithuguiti. Aingi aitu, nitwagaga bata wa guthii kanitha, ati tondu mami na baba witu nimathiaga kanitha na nimatuhoyagira. Angi nao moigaga, ndingithii kanitha tondu ona ndakua ndikaga guthikwo ni muhunjia, ati tondu ng’ania witu ni mutongoria wa gikundi gia kanitha, na niagathaithanira kuri muhunjia.

Ningi angi nimeiraga ati, o matimakaga kuona ati muhunjia niakahinga riitho niundu wa andu ao gukorwo nimathiaga kanitha, na kwa uguo o utungata wa kanitha matingiwaga.

NGAARI CIA NAIROBI

NGAARI CIA NAIROBI HATIKA INI.-By macharia wa wen

Ndiina gikeno kiingi thiini wa Mwathani ngikugeithia , o ringi uri mwega. Ota mutugo,ninyendaga guikara ngikuririkanagia ati he bata gucokagiria Ngai ngatho hindi ciothe. Niakuhete kiheo kia muoyo, kiheo utangigura na mbeca kana uheo ni andu anyu na arata ona makuendete atia, oho Ngai uyu niakumenyereire o uu wega ,agakuhe gia kuria na kunyua na nguo cia kwihumba. Ungirathimwo ni Ngai, ririkanaga kuuga ni wega.

Nii ndi o mwega,na ninguigua ngenete muno tondu Ngai niatuhotithia gucemania o ringi niguo twaranirie,tutarana na tuthuthurie maingi mega muturire ini witu.

Uumuthi ndoiga twirane na twithuthurie uhoro wigii Ngaari. Gutiri mundu utoi ngaari na uteri wakuo ni ngaari. Ngaari ni itutaithagiriria muno hari ugendi, kuuma giikaro kimwe kinya kiria kingi. Ringi ugithii wonjoria, kumatha utonga, kumatha uugi na maundu mangi maingi tondu no tuthiiaga kumatha Muoyo, na tugakuo ni ngaari oro ici.

Ngaari ciothe ikoragwo iri njega. No ona iri njega, nituii ni icungagiriria mitino na ikuu na wonje. Mundu angirathimwo na ngaari, andu moigaga niaratongire. Na nima ni tondu ngaari ni iri mahuthiro maingi, na mundu utakiri kanyamu muhuko no aremwo ni kuiga na kugia ngaari.

Muciari anona mwana wake niagura ngaari, niamenyaga maundu gwake na igweta niciaingira mucii gwake. Na niwega kugia igweta ituura ini.

Ngwirire ngaari ni irehaga mitino, hihi mundu agate muoyo wake, ona kana hihi akonja. Mitino ino irehagwo ni ringi ngaari igie na gathina, ndereba, barabara ona kana kuuna watho. Mutino uyu, no urirgiririo na njiira nyingi. Wa mbere, ndereba mwega uria urumagiririra mawatho ma barabara, ngaari kuroragwo kaingi na kaingi niguo kumenya niha ringi hekubatara guthondekwo, gutiga mwitio na mwiyungururio, barabara njeega na mangi maingi.

Njugire twicuranie uhoro uyu wigii ngaari, ni tondu, ona ngaari ciothe ciagira kana ciathuka, ngaari cia Nairobi ninjuru muno. Ninjuui aingi aitu nituri twathii Nairobi na kana nitwendete guthii Nairobi. Gitumi kianjuge ngaari cia Nairobi ni njuuru ni tondu, aciari tukirera ciana ciitu, tucirutaga kwehera barabara twona ngaari, no tuticiiraga gitumi.

Muno muno ciana cia anake niciendete ngaari muno. Na nokio ona kaana ga kamwana ge kanini, geciragia o uhoro wa ngaari na nyumba. Ugakionaga kaana kau ngarenda o guthondeka tukaari twa ndooro, micakwe, mabaati na tumaundu ta tuu. Giki nokio gitumi kinene wonaga tumwana tukienda gutinda tugithiururuka ngaari, itari ndamenya nikii gikoragwo gigiethwo. No njiguaga andu makiuga he gacuuma imwana ciateire na ciiciragia nogakorwo ni kamwe ga tucuuma turia tukoragwo ngaari ini.

Gitumi kinene kia njuge ngaari cia Nairobi ni njuuru ni tondu, niciuragaga ciana cia anake muno. Gitumi ni tondu, mwanake anarikia githoomo, gwaake kwega no Nairobi. Athii kuu, muturire niuthiaga ukamwagirira ,kana riingi ukamuthukira. Wamuthukira ambagiriria gwicurania uria angigeria gwiika niguo eyonere uboco wa o muthenya.

Matua make mahota gukorwo ni mega ona kana makorwo mari mooru.  Matua maya nimaracungiriria mitino miingi, uu ati, andu a gicagi tuthiite tukimenaga ngaari cia Nairobi.

Ngaari cia Nairobi ninjuuru gukira ana muthigari wina muciinga wake aiyuirwo ni marakara. Gitumi ni tondu, muthigari uyu ona angiuraga mwanake wa Gicagi, undu ucio nduoyagwo na uritu ta kuuragwo ni ngaari. Giki nikio gitumi kinene kiratuma tuigue, mwanake wa nyina wa ng’ania niaroragirwo ni ngaari Nairobi.

Mundu athii kuiya indo ciene Nairobi, anyitwo oragwo ni muingi, kindu kiria kiina haaro ni ngaari. Kigenyo kiria kinene muno kana kindu kiria kingiigirirwo kigenyo kiu no ngaari cia Nairobi. Mundu ahurwo rithathi akiiya Nairobi, no ngaari cia Nairobi.

Kai ngaari cia Nairobi ciehitiire anake a gicagi uu niki? Muciari riria mwana waku arikia githomo, na akwira  nieguthii Nairobi gwetha wira, niugiaga na giikaro nake,umwire Nairobi yendaga mbiia hiu,yahitia mukwa irie nganangu? Rira mwanake waku athii Nairobi, niugiaga na ihinda ria kwenda kumenya ni wira uriiku arutaga kuo? Mwana wa mwanake niekubatara kuneo kana kuheo mataaro muno. Na nokio etagwo,” Mwana kee” nikii kiu aneagwo akorwo ti mataaro?

Muciari giaga na giikaro na mwana waku wa mwanake, niguo kumutaara mitugo miega muturire ini, rira ari mucii ona kana oimagarite. Mwirage Nairobi niiri makua na mariuka.

Ndikiitie kuigua,mwanake angiuragirwo Nairobi niundu wa mitugo miuru ta ya uici, andu a gicagi na aria mahenekaga tuhenagio araringiirwo ni ngaari. Ngeyuuria ,kai ngaari ici cia Nairobi imenete anake uu niki. No ngacoka ngamenya itimathuuire tondu nocio icokaga kumaingata Nairobi ikamacokia gicagi o uria cia marehire Nairobi.

Mwanake wathii Nairobi, tuika muundu mwega, mundu ungiheka gitio ni andu a Nairobi na gicagi. Waaga uguo, Muturire wa Nairobi niugukurituhira muno. Ni kaba ungiikara gicagi urimi matharu na uriithie nguuku, gukira uikare Nairobi naguo muikarire  waku ukorwo wi  hatika ini.

MUCII MWEGA TI MIGEMIO

 

MUCII MWEGA TI MIGEMIO-  By Macharia wa wen

Oota mutugo reke mbere ndaya nyambe njoe mweke uyu ndaheo ni Ngai niguo ngugeithie na ngeithi cia Mwathani,Uri mwega muruna wakwa na Nitumukumie Yesu Kristu, Mwathani agocwo. Gikeno giakwa ni ati ngeithi ciakwa ni wa ciamukira wee Mukristiano Mugatoreki, na wageithika Nitumukumie hingo ciothe. Nawe Mukristiano wa kanitha ungi o woothe uria hamwe na akristiano a Gatoreki twitikitie Kristu niwe Mwana wa Ngai, ninjui ni wamukira ngeithi ciakwa na wamukiria naciugo ciagukumithia Ngai, na woiga Agocwo hingo ciothe Muru wa Ngai.

Ihinda ini riri nindironire ni wega  twicuranie uhoro wa mucii, turanie mucii nikii,kana nuu. Ninjui ingikuria mucii nikii ndungiaga undu unginjokeria ,ringi kuringana na woni waku, hihi na njira ya guthoma, kuigua kana kumenya.  Mundu o wothe ni ari kuria  etaga mucii gwake  kana kwao. Ona nyamu cia githaka mucii kwao nikuu mutitu na nokuo githaka. No hanakinya haha naho hakaringana nyamu iyo iikaraga kuu. Nyamu ingi nitui wega cikaraga nyeki ini, ingi marima na iria ingi miti iguru. Twathii maai ini tugakora nyamu ingi iria cikaraga maai ini.

Mundu ta kiumbe niendaga guikara mucii mwega. Mucii muthaka na wi handu heega. Angi aitu twahotithio ni Ngai tondu niwe ukinyanagiria maundu moothe, tugaaka nyumba cia mahiga, angi cia mbaau, mabati , ndooro ona kana hihi maturubari. Ici ciothe ni nyumba no haria mwakire wacio utiganite. Na bata munene ni mundu oone ha kurara. Riria mundu aaka nyumba ya mahiga, muingi wa gicagi kiu ugaga ng’ania ni gitonga. Nake uria uikaraga kanyumba ka ndooro ona reke ndimiite nyumba njeherie uhuthu wa kiugo kanyumba, amwe aitu tumonaga tari andu matehotete. No uuma niati uguo tiguo kuri.

Niwega gwitikira haria ukomaga kana uumaga tondu hau niho haku hega. Na ndukanateng’eranie na mundu uria ungi ati niguo muiganane, tondu ona miiti ya githaka ndiiganaine na ndiri hindi ikaiganana. Ni kaba gweterera irathimo cia Ngai, gukira guteng’era ihenya inene muicoini ukarigiriria na thiina munene gukira uria wari naguo kabere. Aingi acio wonaga menacio gutiri waciarirwo nacio. Ni wira marutire ,namakiuruta na kio nake Ngai akirathima wira wa moko maao.

Ningi o gicagi gitiagaga mundu gitonga kia indo na mundu muthini wa indo. No ugie na utonga munene na wage thayu kana ugima wa mwiri. Riria uraaga tooro nigwitigira turia nime, muthini ucio uhuthagia akomete tooro akananogoka. Kuri urathimagwo na indo icio nyingi kinya mbeeca nyingi. Ungihota kuria irio cia mithemba yothe, ciina nyama oro muthenya, no aruara athii thibitari akahingwo kuria nyama. Nake kuri uruaraga na ndari nacio agathirwo ariage iini na anyuage koko na iria, na kuona indo ici ti undu muhuthu hari wee. Kwa uguo muruna wakwa,kindu kiria kii bata muno mbere ndaya, ni kugia na thayu na ugima wa mwiri. Maundu macio maangi tugaga ni matigari ma nda.

Njiguaga tukiuga mucii ni nyumba thaka na aria maikaraga kuo. Angi nao moigaga mucii ni kioro. Nitondu ona ungiaka mucii mwega na wage kioro ucio ti mucii. No ona thengia wa maundu macio moothe, mucii ona tukiugaga ni nyumba na aikari kuo,kana hihi ringi ni kioro ota uguo tukiugaga,tutingiuga ati twoona nyumba njega meciria ini maitu tugeciiria aikari kuo ati niega. Gitumi no makorwo mari eega na ringi hihi makorwo tiega. Mekwaga kwagirira haa? Giki ni kiuria kimwe njuii giaguuka hakiri ini ciaku.

Gitumi kia njuge to muhaka mucii wathaka aikari kuo makorwo niega muno nitondu, mucii ucio wahota gukorwo uthakaritio ni mbia cia muingi na njira ya ngungo, ona kana hihi uici,utunyani kuhoya maroho maria tuiguaga mari kuo ma ngoma, na niundu ucio ota uria ngugiite hau kabere, kenera kiria uri nakio nikio giaku kiega.na kiu nikio ungitiira uge nigiaku.

Micii miingi yanakwo na ikagemio muno. No oona thengia wakugemio na gwikirwo kiria giothe kibataranagia thiini wa mucii, gugakorwo sofaset yaingirire mucii ucio, wendo ukiumira ndirica. Kabati na tarabiconi ciaingirire  nyumba iyo,thaayu ukiaga hakuigwo. Mbeeca nacio ciangiririo nyumba iyo, gitio kia Ngai na kia mucii gikigagaya. Unene wa nyuumba na uthaka waayo ,iri na utiganu munene muno na maundu maria matumaga mucii utuike mucii.

Mucii uria uri thayu na uiguano ucio ni mucii. Mucii uria andu mendaine na maikaraga na thayu hatari nguui,ucio naguo ni mucii. Mucii muthinguuku ndooro igaitika, na aria maikaraga kuo nimendaine ,ni mehokanite, nimahete Ngai gitiio, ucio naguo ni mucii. Tiga kumakio nimucii niundu wa nyumba kuneneha, guthakara, kugemio kana maundu macio mangi moothe mekagwo micii ini. Mucii uria mwega , niuria muthingi waguo ukoragwo wakitwo haari Mwathani. Aikari a mucii ucio nimaheaga Ngai gitiio kiria gii kia Ngai, maikaraga mendaine na nimanyitanagira haari maundu maaria meekaga magwaka mucii ona bururi.

Mucii ndwakagwo ta uria ungi. Haha ningwenda unyite wega.  Hau witaga mucii reke hagukenagie. Cokagiria Ngai ngaatho muno niundu wa gukuhe hau wonaga ha gukoma. Na oho agakuhe gia kuria,gia kunyua na nguo cia kwihumba. Na tondu ndituraga haria yoimiriire, nyumba ta nyumba gwaku ona kuo no yakwo njeega, nene na thaka makiria. No kiria kiri na baata haha ni nyumba iyo ndigatuike mucii. Uguo ni kuuga ati, aikari a mucii nio me bata ti nyumba. Na oho twoiga ati mucii mwega niuria aikari a guuo mekaga maundu mega maria mangikumithia Ngai na magocithie uumbi wake. Maundu macio maangi ni migemio iria ikenagia maitho maitu na aria moonaga ugemu uyu.

    Mucii uria mwega uumaga kindu kiega. Muthuri mwihokeku, mutumia mwinyihia na ciana njathiki. Ucio niguo tungiita mucii mwega. Ni kaba ugie na nyumba nini, naguo mucii waku ukorwo wakitwo muthiingi ini wa Mwathani. Ningi nonyende muruna wakwa uikarage ukiririkanaga ati, kanitha yakitwo ni mucii. Na uguo ni kuuga aikari a mucii nio mathondekaga kanitha. Aikari aya mucii wao ungikorwo ndwakitwo muthingi ini wa Mwathani, kanitha ingiikaraga iri na kiagago.

Andu aria mahete Ngai gitio, nio aria mathondekaga Kanitha mwega na murumu. Tondu nguui, uici, uragani, utunyani ,ukoroku, uiru na maundu macio mothe mooru mationaga kaanya thiini wa Kanitha wa Ngai. Ningi niwega turirikane ati mucii mwega nikuo kuumaga atongoria eega a Kanitha, athinjiri Ngai, aciari eega, ciana njeega na atongoria eega a bururi.

KIRIA GITHAHAGIA MAHOYA

KIRIA GITHATAGIA MAHOYA MAITU-by Macharia wa Wen.

Nindakugeithia o ringi muthooni wa ngathiiti ino njega ya mwihoko uri mwega. Ni mwihoko wakwa Ngai ithe witu niakumenyereire o wega, na wina gitumi kinene gia gucokeria Ngai ngatho, niundu wa maundu macio moothe. Muini witagwo Rosemary Ayuma kuuma matuura ma Mugoiri, ari ruimbo rumwe aturirikanagia ati,” Ungirathimwo ni Ngai ,uririkanage kuuga ni wega”. Uguo niguo kuri.

Riu iteguute kahinda ona hanini tondu mathaa ni mbeca, uumuthi ingienda twicuranie uhoro wigii mahoya. Kuhoya ni kwaria na Ngai. oho tugacoka tukoiga ni irio cia mugendi. Mugendi uyu nuu? Ni mundu uri na kioneki na wihariria munene niundu wa guutura agocithagia Ngai, nitondu hari handu arathii. Handu ena mwihoko mukinyaniru.

Gitumi kinene kia njuuge twicuranie uhoro wigii mahoya, nitondu muundu o woothe niagiaga na kahinda gwa kwaraniria na Ngai wake, niguo amumenyithie mabataro make, na makiria muno ningi niguo acokerie Ngai ngaatho na oro ho ahere mehia make.

Meehia maria mundu ekaga, nimo mamweheranagia na weega wa Ngai. Mehia maya, twihagia na njiira ya umenyi mukinyu , kuhuthia uigiririki wa kuhingia maathani ma Ngai ona kana hihi kwaga kumenya , ona ringi na ringi niundu wa uhuthu wa miiri itu.

Kuhonoka nakuo ni kuuga atia? Mundu niahonokaga ringi mutino ini thiini wa muturire wake, ona kana hihi mutino o ungi wothe. Oho muundu niahonokaga agataukwo ni wega wa kuhingia wendi wa maathani ma Ngai.

Aingi aitu tugaga kuhonoka ni ngoro ya mundu. Angi aitu tugaga kuhonoka ni guuthaama kanitha na guthii kanitha ungi. No wega kuraringana na uria muundu ataukagirwo ni uhonokio. Ona tukiugaga kuhonoka ni ngooro ya mundu, hari ona gathiina handu. Nima ngoro ya muundu nikuo kuumaga maundu mega ona ringi na ringi maundu mooru.

Kiugo kiugaga ati,kiria mundu ariaga kana akanyua tikio kimwikiraga thaahu, no nikiria kiumaga thiini wake.  Hau ni ndoima. No ninduurite na kiuria kiriitu ndiyuragia thiini wa ngooro iyo yakwa iyo ihonokaga. Ndiyuragia, nikii gituumaga ngooro yetikira kuhonoka na ni kiiga kimwe kia mwiri, ciiga ingi ikaga kuhonoka?

Haha ndoiga ni noru ndinoiga ithiinjwo. Ningi kwaria ti gutua ciira. Na ndoiga uuru unjitikire oro uguo ndarii. Muthuuri umwe wari mwitikia na oho mutongoria wa kanitha umwe, niakinyire handu akiriganirwo ni uhonokio waake, na kiria gituragia mwihoko waake wa gugacemania na Ngai. Agiituika we ndendaga kuona mbuuri ikihituka, haha nguciuna ikomo kimenyi amenye .

Riu muthuuri uyu agituurite arumiriire mbuuri ici kinya cia kanitha ati nikuiriithia. Kumbe nyingi ciacio ni iria ariiga.  Muthenya umwe muratawe namuririe, kai uhonokio waake uthiaga uhorokeire nikii, na ngooro yake kai yahonokokirwo uu ati maundu amria ekega nimonanagia uhonokio wake nimuthararu.

Acokeirie murata wake ati, we akoragwo ahonokete kuuma mutwe kinya njohero. Ni guuku kungi nikwaregire gutaukwo kuhonoka ni kuuga atia. Niundu ucio, reke tutuike andu a kuhonoka ugima wa mwiri woothe.

Maundu maria matumaga mahoya maitu matharare ni maundu ta macio. Mangi namo ni maundu maria twikaga tukimenya ona kana hihi ringi na ringi tutekumenya. Maita maingi ngienda o gukuririkania, ni ati nituthahagia mahoya maitu nindu wa ciugo cia tuunua tuitu. Ninguririkana ngikwira, ti wega kuuga, “ Ngai uuka na ndugatuumane” .ici ni ciugo ciumaga tuunua ini tuitu, na ciugo icio ni ithahagia mahoya maitu makaaga kuhinga. Riria mundu oiga Ngai uuka na  ndugatumane, akoragwo wa mbere agiatha Ngai ati wee ndekwenda gutamanirwo. Ekwenda Ngai wee mwene erehe niguo acemanie na  mabataro make.

Ngai ahuthiraga aruna aitu niguo mathiina maitu mathire. Ngai ahuthiraga o  umwe witu na njiira ya muundu cuio ungi mukaranagia naake kana mucemanagia nake.

Undu ungi uria uthahagia mahoya maitu ni gwitiganiria hari Ngai. Gwitiganiria ni ritwa rihuthiragwo muno ni amwe aitu,. Gutigania ni kuuga atia? Kuringana na nii ta Macharia wa Wen ,agikuyu kuuma murang’a, nit a kuuga nduuri na uhoro. Ni gwitiganiria oro uguo ta kindu gitari na bata. Mundu angikwira  “Tigania kindu kiu hau” akwira atia? Akwira kindu kiu gitiri na bata ucio munene. Uguo no taguo amwe aitu twitiganagiria hari Ngai. Niwega kwi iiga hari Ngai, kuiga maundu maitu moothe na uuturo witu hari Ngai, gukira gwitiganiria,na gutiganiiria maundu hari Ngai. Kiugo gutiganiria nikiagaga gitiio gikinyaniru mutaukire ini wa ruthiomi rua ugikuyu.

 O undu umwe, tiga gutiganagiria wira wa Ngai. Ikaga maundu maria mega thiini wa utuuro waku. Tuika mundu muhoi utuuro ini waku. Ngai niaiguaga mahoya na agacokia. Kindu kiria ki bata muno ni kugia na witikia mukinyaniru na gutaukwo ati,Ngai ndahiuhaga na ndaceragirwo. Ookaga kahinda karia kagiriire.

Niwega gutuika andu a gucokagia ngaatho. Uu ni na njira ya gukumia Ngai, kumugooca na kumucokeria ngaatho, na oho guikaraga tukiheraga mehia maitu maria twikaga niundu wa uhuthu wa miiri itu, niguo Ngai atuonage turi andu agiriru uthiu ini wake.

Ngai ithe witu andathime niguo hotage gwiika uria endaga riria ndi guuku thii, niguo matuku ma muthia wa utuuro wakwa wa guuku thi, ngathii tugaturanagie naake mucii ini wake wa matu ini.

GWIKA WEGA NI KURATHIMITHIA

GWIKA WEGA TO  KURATHIMITHIA-  macharia wa wen

   Wimwega na nitukumie Yesu Kristu. Icio ni kuri wee Mugatoreki. Niundu waku wee utari mugatoreki, Bwana asifiwe sana.

   Ici ciothe ni ngeithi cia Mwathani. Na wanona mundu agikugeithia ndaguthuire. Mundu ucio niakwendete ta muruna. Tiga murata.  Ndeciria twicuranie uhoro wa mundu mwega na wega wake. Mbere ni kiuria. Mwarimu mwega ambaga kuria murutwo wake kiuria kimwe kana igiri niguo aamenye kana hihi murutwo wake niehariirie wega hari mathomo ma       muthenya ucio. Na tondu wee nawe wi murutwo wakwa,gutekumakania uigana atia, wiha kana ugaga atia, riu itikira ati ni nii murutani waku. Uguo niguo kuri.

Na tondu murutani niwakurutana nake murutwo ni wakurutwo, wee ugwiciria nikii kiu murutwo arutagwo ni murutani? Kiu wicokerie muruna. Ingiuga kiria murutani arutaga murutwo, ndoneka ta nguuga uru. Niwe wi kuu.  Uguo niguo ndiraigua thiomi cia kiriu ikiario mundu akienda gugutigira kaundu ga gwicurania. Ati “NIWE WI KUU”.

Kiuria kiu kingi ingienda wiyurie ni gikii. Mundu mwega nuu kana niuriku? Ninjui gatagati ini gaitu gutingiaga amwe aitu aria mangiuga mundu mwega niuria wikagira nguo thaka, uria ukinyukagia wega, uria muthomu muno ona angi moige niuria mutongu muno itura ini kana bururi ini.  No wega ,kuraringana na muonere wa mundu ta mundu kiumbe.

Nii ta Macharia wa Wen, mwonere wakwa hari gutaukwo kana gwiciria gwakwa ni ati, mundu mwega niuria wi ngoro njega iyuritwo ni thaa na waragania. Mundu uria ungitaithia mundu muthini na kugayana kiria ari nakio niwe mundu uria ingiuga ati ni mwega. Mundu utari uiru ngoro ini yake ni mundu mwega. Mundu utaragia ciene niguo ithegeyie rumena bururi ini ,kana itura ini,uyu ni mundu mwega.

Mundu mwega ti githithi kana nyama cia mwiri. Aca. Mundu mwega ona mitugo yake na miikarire yake niyonanagia ati ni mwega. Niendete andu othe, nianyitanagira na andu aria angi hari gwika uria mwega, na ningi niendete kuruta andu aria angi uhoro wa gwika wega, kuri andu aria ngi ta ciumbe cii bata hari Ngai.

Kuiguanira ha ni gwika wega. Mundu aiguagirwo tha niundu wa maundu matiganite. Ringi niundu wa ndwari, niundu wa wagi niguo angi aitu twitaga thiina na maundu mangi maingi ta macio. Ona mundu uria wikaga uuru niaiguagirwo tha ni andu aria maiyuritwo ni tha . na niwega gwikaga wega muturire ini ni tondu maundu macio mega wikaga nimo macokaga kurehe kirathimo muturire ini waku.

Ni nguririkana hari hindi ndoritie kiuria giki na no ngugicokera. Nakio kiuria giatarii tau u,” Niatia wega gutaithia mundu na kumurathimithia mundu?”

Mundu angiuka gwaku ari muhutu ,umuhe giakuria na gia kunyua kana umwire ndakamake Ngai niekumuteithia, niri wikite wega?

Mundu mwega niateithagia mundu wina thiina mbere ya kumurathimithia.  Ngai aikaraga gatagati ini gaiti ari na muhuanire witu. Kiugo kia Ngai gitwiraga ndungihota kuuga niwenda Ngai utambite kwenda ucio wonaga o muthenya kana hihi muikaranagia nake.

Mundu onoka gwaku ena thiina o wothe, amba umutaithie mbere ya kumwira Ngai niekumutaithia.  Mundu ucio niabataritio ni uteithio  waku muno ihinda riu. Tiga kwirorera mundu akiria thiina ta wang’aragu na nyoota ,na handu ini ha umuhe gia kuria na gia kunyua, niundu wa uria uhonokete na wi wa kanitha muno, ati kiria ungimutuga nakio no kumwira Ngai niekumutaithia. Na hindi io wina irio nyungu ini yaku. Ndinoiga ati ciugo cia kurathimithia mundu ati itiagiriire. No uria ndirenda kuga ni ati, ni wega twambiririe na ciiko. Ciiko ni njega gukira miario.  Wamwira Ngai niekumutaithia, Ngai oke arugire mundu ucio rio kana macemanie na mundu ucio njira ari we mwene oke amutaithie? No kiuria. Ngai aingagira thiini witu na ageka ciiko icio ari thiini witu tari ithui tuguciika. Na notaguo ngoma aingiraga thiini witu enda kwihia, niguo ehie e handu ehithite kana akenyitirira.

Ngoma ndoimaga kuria aikaraga agoka akehia ari wee. No uria ekaga ethaga  mundu tanii kana tawe. Akehitha thiini wake. Naguo wihia wothe uria atanyite kwihia athirikie Ngai naguo, akamenya wega ati egukuhuthira niguo onawe ugacirithio take uigue uria aiguire na aiguaga. No taguo Ngai enda kwigocithia, aingiraga thiini wakwa kana thiini waku na agekira undu ucio mwega thiini wakwa niguo njiike o uria angienda njiike egocithie na nii.

Gitumi kia njuge mundu mwega ni mwega na aturaga ari mwega ni tondu, mundu uyu ekaga uria Ngai endete na endaga wikwo. Ningi he bata kumenya wega ati, waga gwika wega riu wagiriirwo ni gwika, ruciu ukiwika ugakorwo wi mutuire ciira.

Ngitiriha, ninyendete muno kuheana rugano ruria ingiona ati no ruonanie mbica irahanana na githomo giakwa. Hindi imwe kwari murimi umwe wari na Ndigiri aingi tuciui ta bunda. Murimu uyu niarutaga wira wa biacara. Na niundu ucio indo ciake cia wendia akuaga na ndigiri ciake. Muthenya umwe niendire guthii thoko tuge oimite Mugoiri athiite Mukuyu. Agikioherera  mirigo yake ndigiri ini ciake. Na mari rugendo ini ndigiri imwe ikiheherera iyo ingi ikimira” muruna, ndiraigua kugwa man” ndiraigua ngikinyia mirigo ino mukuyu.”. no turiambatia karima kaa Maragi? Ai. Nduuge ugairwo tumirigo tunini nari huthahuthirwo hote gukinya mukuyu nari ona ngakione mbaathi.

Iyo ingi ikimiira,”muriga nau?” beba mizigo yako. Matanakinya Ndikwe, ndigiri iria ikihotwo ni thabari. Ikigwa na ikiremwo ni gukinyia mirigo yayo. Murimi ekire atia? Oire mirigo iria yothe, akimitukanira hari ndigiri ino