UTHAKA WA KANITHA NI UKRISTIANO

Macharia wa Wen

UTHAKA WA KANITHA NI UKRISTIANO-by Macharia wa Wen

Oota mutugo, mbere ndaaya njitikiria nyambe ngugeithie na ngeithi cia Mwathani. Uri mwega na nitumukumie Yesu Kristu. Nii ndiimwega na nindiraraha wega na ukumio wa Ngai, gitumi niathiite na mbere na kumenyerera, akahe ugima wa  mwiri na makiria ya moothe niahete Kiheo kia muoyo. Murata muruna wakwa ninyendaga guikara ngikuririkanagia kaingi na kaingi ati, ungirathimwo ni Ngai, Ririkanaga kuuga ni wega. Na muno makiria reke nguririkanie oro ringi ati, gutiri kindu kia goro Ngai atutugaga nakio mbere ta kiheo kia muoyo.

Aciari aaku, andu aria muciaraniirwo, arata na andu othe no makuhe kindu o giothe kiria ungibatara riria uri guuku thi. Noo  kiheo kia muoyo nikio kindu kiria matangikuhe oona mangikorwo makwendete atia. Noo Ngai ithe witu tondu ni mutana na muuma andu muno, atutugaga na kiheo giiki oro uguo tuhu.  Na noo wega nguririkanie ati, oro muthenya wokira, niwega ukamenyaga ati Ngai eena undu arorete akona niukubatara kugomanio, na wee niwe ungigomania undu ucio. Gitikirage oro muthenya gutigagirira niweka maundu maria magocithagia Ngai.

Uumuthi ingienda twicuranie wega na uthaka wa kanitha ni kii kana nikuuga atia. Aingi aitu tungiurio kanitha nikii, tungiuga ni nyumba ya Ngai haria tuthiaga kugocera Ngai tukimucokagiria Ngatho turi hamwe. Na noo wega  ni tondu mundu oo mundu niari utauku wake wigii kanitha.  Kanitha ni nyumba ya Ngai. Hau niguo. Nyumba ini ya Ngai nikuo muingi uunganaga muthenya wa kiumia, ona kana ringi muthenya uria mwamure, ona kana ringi haria mundu athiaga riria ekwenda kwaraniria na Ngai wake. Handu hahoreru, hhena thayu, handu hamure, na ithui ta Agatoreki tugataukwo kumenya ati ni haria ha Ngai hamure muno makiria, na thiini wa miceni ciitu tukamenya ati Kristu Mwana wa Ngai niakaraga Tambanako ini ari muhuanire wa Mugate na Njohi.

Thengia wa gukorwo kanitha ni giikaro kiu kiamure, niwega tumenya kanitha njeega yambagiriria micii ini iitu. Na kanitha uria muthingi waguo wakitwo na ukristiano murumu, kanitha ucio niugiaga riri. Nayo kanitha ta nyumba ya Ngai yakagwo ni muingi wa Akristiano manyitaniire. Nio maiguithanagiria uria mangienda kanitha wao uikare. Makaiguanira kana megwaka kanitha wa ngoroba, wa mahiga, wa mabati, wa mbau , wa hema tondu twanakiona makanitha maangi makitwo na heema, ona angi makahoyagira ruungu rua miti ta migumo. Icio ciothe ni kanitha thengia wa miakire na mihuanire.

Noo ona thengia wagukorwo moothe ni makanitha, ngwirire kanitha mwega na muurumu wambagiriria mucii. Mwecii mwega tugaga ni kanitha njega, nayo kanitha njega tukoiga ni mucii mwega. Mucii wakagwo ni muthuri, mutumia ona ciana. Icio ni itugi ithatu. Noo tikuuga mucii waga ciana ati ti mucii. Aca. Nitondu ihiga ria koine nirio rina bata munene haha niguo mucii utuike mucii mwega. Thiini wa micii itu nikuo kumaga thayu. Thayu ucio tukautambia kuri nduriri ciothe, naguo thayu ukagia thii yothe na kuri andu oothe.

Mucii utari thayu nduikarikaga. Naguo bururi utari thayu, tuikarikaga ni nguui, rumena, ukabira, ungumania na maundu maangi maingi maria mathararagio ni thayu kwaga gatagati ini ka muingi. Thayu ungiaga micii ini itu na bururi ini, Kanitha nayo ndingiakika na muthingi uria murumu  na ndingigia riri.  Twakinya kanitha, ngwirire kanitha wikagirwo riri ni akiristiano. Ukiristiano wiitu niguo utumaga kanitha witu ugie na riri na ukumithie Ngai. Tungituika andu meitaga Akristiano na ithui noo ithui turaburuga thayu miciini na bururi ini, kanitha witu ndungigia thayu. Naguo cama wa gutuika mukiristiano mwega ukagia na kigagayo.  Kanitha guthakara ona thengia waguthakara niuria ugemetio na marangi maingi na mathaka, ndungigia riri angikorwo ithui aria twitanitio naguo tutironania uthaka wa ngoro ciitu. Naguo uthaka ucio wa ngoro ciitu niguo utumaga ona kanitha witu thengia wa uthaka wa migemio, utuike kanitha mwega wa Kristu Muthamaki.

Twanaiguo haaro makanitha ini. Angi makiruirira utongoria, angi makihaaruo ni kungumania mbeca cia kanitha, angi ngarari. Maundu macio moothe mangituika magwikika thiini wa makanitha maitu, ona kanitha ucio ungikorwo ugemetio atia, ndugiaga mbica njega yagwitanio naguo. Ona thengia wagukorwo ni kanitha wa Kristu. Tugaga wathambia gikombe na njaa giathera, tigirira nigitheru kinya mwena wa nathiini. Kuu ona nikuo kuri na bata muno makiria. Ngoro ciitu nicio gicicio kia maundu maria mega. Na ngooro ingigia kinyita, ihingagiriria maundu maria mega makaga gutuika makuguna muingi, na muno makiria makaga gukuguna wee mwene.

ITEGA TOO GUTEGA

ITEGA TOO GUTEGA TU.-by Macharia wa Wen

Wimwega muruna. Tuirigaine mweri muthiru,noo ngukihoka maundu noo mathiite wega,na Ngai witu noo akumenyereire wega. Nii ndi mwega Ngai noo amenyereire , na niundu ucio nindiragatha Irathimo ciake. Mugikuyu oigaga mbeu ti ya kinya kimwe. Niwega kugaruragira. Umuthi  tukugarurira na njira ya gwicurania Itega nikii na tutegaga atia.

Gutega ni kuheana. Ari na njiira ya gutanaha, kuri mundu ungi ona kana ringi kuri Ngai. Na mundu mutana niakenaga ona agitanaha kiria arathimitwo nakio ni Ngai. Thiini wa micii itu nituonaga riria mundu egucera,niekagira kindu gakabu ini gake niguo ona akinya haria eguthiaga akorwo na kindu giakwaurwo.

Muno makiria nituonaga atumia aingi aria ataana tondu gutikiagaga aria akari, aria atana matingiumirira mundu mooko matheri. Na muno muno kundu kuri na ciana. Niwega gutuika mundu mutana. Kuri andu aria angi ona kuri Ngai, ni tondu utana niuthukagirwo na gitio muno.

Thiini wa Kanitha niturutagwo kirira kigii kuhunjia na njira nyingi iria imwe yacio nii kuruta muhothi  thiini wa nyumba ya Ngai. Muhothi wa nyumba ya Ngai, niuhotithagia kanitha hari uthii wa nambere. Ni tondu oota uria tuui, muhothi niutemaga njira haria hatari njiira. Na muno muno muhothi wa mbeca. Mbeca nicio itemaga njira.

Niguo kanitha ithereme, nikubataraga mbeca. Mbeca ici ni muhothi uria uhothagwo ni Akristiano. Kanitha ni ibataraga muhothi wa mukristiano niguo ihota gutherema, niguo mugambo wa Ngai uhote gukinyira aria angi.

Ni mukristiano uriku wagiriire kuruta muhothi wake kanitha ini,na muhothi urutagwo atia? Ici noo ciuria iria aingi aitu twiyuragia. Mundu uria wagiriire kuruta muhothi wake nyumba ini ya Ngai ni mundu wothe uhetwo mihumu ni Ngai. Muhothi wake naguo akauruta ari ta njira ya gucokeria Ngai ngatho. Ningi ni wega tumenyage ati, indo iria cithe tuonaga thii ino, ciothe ni cia Ngai. Ithui noo kuramata turamataga taa aramati.  Na niundu ucio niwega na ithui tugacokagiria Ngai ngatho.

Mundu riria ekuhotha muhothi wake nyumba ini ya Ngai, niwega gutega ona ngoro yake kuri Ngai. Riria uguthii aratari ini gutwara muhothi kana itega riaku, wiheane kuri Ngai. Withaithanirire kuri Ngai niguo akurathime na akurathimanirie na itega riu. Riria ugutwara itega riu, ririkanaga ti riiganu mbere ya Ngai. Thaitha Ngai akenio ni itega riaku ona rianyiha.

Tegera Ngai itega na muhothi waku ukenete. Tiga kuhotha tondu nikurahothwo. Hothera Ngai na ngoro ina wendo. Ningi tegera Ngai itega riaku na gitio. Niwega gutega na guoko kwa urio winyihitie. Muhothi ukihothwo na guoko kwa urio mundu nionanagia gitio.

Undu ucio ungi, ninyonaga thiini wa kanitha ciitu o gikundi gia kanitha nikiheagwo mweke kana muthenya wakio wa gutungata. Muthenya ucio aingi aitu kana ta mumemba wa gikundi kiu nitukaga na muhothi niguo kwagirithia muthi ucio. Noo nindikitie kuona ati, aingi aitu twitikitie itega noo itega niguo tutigaconoke twi gatagati ini ka aruna aitu na tutiri na muhothi. Nikio wonaga mundu ona angikorwo ena itega angihothire ahothere Ngai, tuteng’eragira kanyamu o kanini nduka ini niguo turikorwo muhari ini wa aria maritwara itega ria aratari ini.

Ugakiona mundu ena mbembe gwake mucii. Noo ndangitikira kuruma mbembe icio naari mukebe umwe akarute ta itega riake. Ndinoiga kiria tuhothaga ti kiiganu. Aca. Noo nonyende tugarurire mwiciririe wa matega na mihothi iitu nyumba ini ya Ngai. Indo ici imwe ciacio iria turuta ingi ni ithukaga na ihenya muno. Itingiikara gwa kahinda kanene. Na nikio nii nguringana nanii, handu ini ha guteng’era ugure mutu wa mbembe na uuma na mbembe ungihothire, ni kaba kuhotha mbembe icio ni tondu ciingigwo wega noo cikare kahinda kanene.

Reke tuuke hari gacunji ga ikumi. Gacunji ga ikumi ni kiria ucokaniriirie mweri mugima kana gwa kahinda kau winako. Wahanda mbembe mihari ikumi, getha mihari kenda naguo wa ikumi utegere Ngai. He muini nyendete witagwo Ambrose Gachau, ee ruimbo oigaga gacunji ga ikumi tutegere Ngai. Ati tuonaga cia guthomithia na ciakuruta mahaki noo tutingiona cia Ngai. Na kuringana nanii kuhitukira ruimbo ruru, niima mbeca ciagwika maundu maitu nituhotaga guciona noo hakinya ahkurutira Ngai, tugathuna guoko.

Twakaga manyumba manene na tukamagemia muno,noo nyumba ya Ngai tukamitiganiria. Gacunji gaaka ka ikumi mundu arutaga akirutira Ngai wake. Ngai atuheaga indo nyingi muno. Na tungicurania uhoro wigii kuruta gacunji, ti uguo twiciragia. Ona kuheana mathaa maku kiu noo gicunji. Ngai ni arathimaga ngoro iria irutaga ikenete. Tiga kuruta gacunji ati niguo kanitha igakunyitirira riria ukamibatara.

Undu uyu wa ati waga kuruta gacunji kanitha ndigakunyitirira mabataro ini maku, ni kaundu ingienda tweherie ngoro ini ciitu biu. Gitumi ni tondu amwe aitu turutaga niguo kandi ndigatigwo na ndigiriri ya hindi utarutire. Noo tutirutaga ni gutaukwo bata munene wa kuruta gacunji.

Na ungienda kumenya niguo, Ngai ndakuheaga kindu kiiganiire hindi ciothe. Ndirenda kuuga, ungioya kandi cia gacunji ga ikumi cia andu amwe, wahota kumaka muno wonete maturaga marutite ciringi igana rimwe kuuma  nJanuari kinya ndithemba. Uguo ni kuuga atia? Ni kuuga mundu ucio athukumaga ciringi ngiri imwe mieri yothe. Na ndakiragia hau. Na noo wega. Noo tiina noo uria, kandi ndikage kuhurwo muhuri.